Bon biní na e wèpsait ofisial
Krus di Mérito di Kòrsou
Danki distinguido kondekorado di pais Kòrsou, pa tur loke bo a dediká na bienestar di nos dushi Kòrsou i nos kompatriotanan
Kerido pueblo di Kòrsou,
For di 2004 gobièrnu di Teritorio Insular di Kòrsou, a kuminsá ku e entregá di Krus di Mérito na siudadanonan ku pa basta tempu a i ta hasi esfuerso grandi sin niun interes personal na adelanto i bienestar di nos kompatriotanan i di pais Kòrsou. E distinshon ta ser duná na personanan ku a aportá ku trabounan meritorio riba diferente área manera sosial-edukativo, sosial-kurativo, sindikal, sosial-kultural, komersio, media i komunikashon i spiritualidat. E aña akí, 2024, ya ta kumpli 20 aña ku Gobièrnu di Kòrsou ta entregá e Krus di Mérito, ku ta e distinshon di mas haltu di nos pais.
Nos tin ku para ketu i realisá kuantu kada un di e siudadanonan akí a i ta nifiká pa nos dushi pais Kòrsou.
"Nan ta nos héroenan"
Na nòmber di Gobièrnu di Kòrsou mi ta ekstendé un gradisimentu sinsero na kada un kondekorado pa nan trabounan meritorio ku nan a desplegá. Alabes mi ta ekstendé mi gratitut na tur e miembronan ku a i ta forma parti di e komishon di Krus di Mérito ku tin e tarea pa duna un konseho na Gobièrnu di Kòrsou pa loke ta trata e kondekoradonan di kada aña.
Tin diferente informashon di Krus di Mérito for di aña 2004 den forma di dokumento, potrèt i video. Komo minister mi ta konvensí ku ta deber di Gobièrnu di Kòrsou pa kontribuí na formashon i edukashon di nos pueblo. Ademas, mi ta kere firme ku "un pueblo informá ta un pueblo ku por pensa pa su mes". Tambe ta konosí ku ami komo minister ta mira Teknologia di Informashon i Komunikashon (ICT) indispensabel den desaroyo di konosementu. Tur e pensamentunan akí, ta kondusí ami, komo minister di Enseñansa, Siensia, Kultura i Deporte, pa hasi e informashon di Krus di Mérito aksesibel pa pueblo pa medio di un wèpsait dediká.
Riba e wèpsait akí, tur ku ta interesá por subi i haña informashon digital di entre otro Krus di Mérito su historia, splikashon di e medaya, e proseso kon ta skohe kondekoradonan i biografia kòrtiku di tur nos kondekoradonan. Di e manera akí, tambe ta duna kada bishitante di e wèpsait un bista riba e akshonnan meritorio ku nos hendenan a i ta desplegá. Laga esaki ta inspirashon pa nos sigui duna di nos parti pa nos pais por sigui prosperá.
Danki pa bishitá nos wèpsait di Krus di Mérito!
Minister di Enseñansa, Siensia, Kultura i Deporte
Sr. Sithree van Heydoorn
Historia di Krus di Mérito
Kumpliendo dignamente ku su labor, señor Rignald C. Lak, komo miembro di Konseho Insular na aña 1997/1998, a bini ku e proposishon na Gobièrnu Insular di Kòrsou, pa instituí un distinshon diferente for di Gobièrnu Sentral (kondekorashon di Reino Hulandes, Ridder in de Orde van Oranje Nassau), kaminda ta kondekorá personanan i òf baluartenan ku den un òf otro ramo a desplegá trabounan meritorio pa isla di Kòrsou. Su petishon a keda hopi bon risibí serka Gobièrnu Insular di Kòrsou i esaki a bai di akuerdo ku e proposishon di Krus di Mérito. Diputado Magda Rafael a enkaminá e proseso pa yega na e Ordenansa Krus di Mérito (P.B. 1999, no. 30). Su susesor, diputado Leonard Coffi, a enkargá Servisio di Kultura i Edukashon (SKE), enkabesá pa señor Moises ‘Boeis’ Augusta i su tim, pa traha riba:
- E komposishon definitivo pa e medaya di Krus di Mérito;
- Reklutashon di miembro pa e komishon Krus di Mérito Kòrsou.
Apesar ku Konseho Insular di e tempu ei (na aña 1999) a bai di akuerdo ku e ordenansa insular di Krus di Mérito, tòg señor Lak mester a kana un kaminda largu i intenso pa esaki keda kristalisá. Komo un berdadero patriota ku ta stima su próhimo i su pais el a keda lucha inkansabelmente te na momentu el a mira e promé baluartenan keda kondekorá ku e Krus di Mérito na aña 2004, bou di enkargo di su kolega i amigu defuntu, diputado Eduardo Cova. No opstante ku diputadonan enkargá ku e kartera di edukashon tabata kambia, SKE a sigui traha pa Krus di Mérito bira un realidat.
Señor Rignald Lak, presentadó di e elokuente proposishon di Krus di Mérito, na interes di baluartenan di nos isla, na Gobièrnu Insular di Kòrsou, a indiká semper, ku su interes no ta pa fama ni gloria personal, pero sí sirbi interes di su próhimo.
Señor Rignald Calixto Lak
Splikashon di medaya di Krus di Mérito
E medaya di Krus di Mérito ta un krus di San Andres den forma ékis (X) , ku esmalte blanku, di kua tur kuater brasa ta mes largu ku un rant di oro. San Andres tabata e promé apòstel yamá pa Hesus. Tabata e ku a bisa: “Ata e lamchi di Dios”. Religion Katóliko ta selebrá e santu akí su dia, riba dia 30 di novèmber. San Andres a keda krusifiká riba un krus forma di ékis (X). Meimei di e krus tin e eskudo di esmalte kòrá ku e palabranan ‘PA MERITO’ ariba.
Tres kaminda mei mei di brasanan di e krus tin blachi bèrdè ku dos rònchi oraño ku ta simbolisá nos laraha. Riba e krus tin tambe un korona di nos eskudo koló di oro. Patras di e krus ta lizu kaminda mester tin un number di registrashon.
E medaya pa hende hòmber ta kologá na un sinta i esun di hende muhé ta kologá na un streki. E kolónan uzá den e sinta i streki, ta kolónan di nos bandera.
Diferente diseño di un medaya pa e kondekorashon a keda entregá. Señor Baron Heerdt a entregá diferente diseño pa e medaya e tempu ei na Kas di Antia (awor Kas di Kòrsou).
Gobièrnu Insular di Kòrsou a skohe un diseño i trese kambio den dje pa yega na e diseño final di e medaya. Señor Tariq Maduro di Mack Graphic Studio a hasi e diseño gráfiko pa gobièrnu yega na e resultado final. E medaya di Krus di Mérito a keda trahá na e estado di Utrecht na Hulanda pa ‘Koninklijke Nederlandse Munt’. Gobièrnu Insular di Kòrsou ta e órgano responsabel pa a kubri e gastunan pa traha e medaya di Krus di Mérito, segun e ordenansa Krus di Mérito (P.B. 1999, no. 30).
Komishon Krus di Mérito
Konstelashon di e komishon
Na aña 2004 a instalá un komishon Krus di Mérito Kòrsou. E meta di e komishon aki ta pa selektá demokrátikamente e kandidatonan pa risibí Krus di Mérito. Durante e añanan 2004 pa 2009 e komishon aki, a keda instalá pa medio di un ordenansa insular. For di aña 2010, ku nasementu di pais Kòrsou, e komishon Krus di Mérito Kòrsou ta keda instalá pa medio di un dekreto nashonal.
E komishon Krus di Mérito Kòrsou ta konsistí di nuebe (9) miembro ku derechi di voto, ku ta asesorá Konseho di Minister di pais Kòrsou den nan tarea pa selektá e kandidatonan ku lo risibí Krus di Mérito. E komishon ta hasi esaki basá riba e kriterionan stipulá den e reglamentu di Krus di Mérito Kòrsou (A.B. 2002, no. 78).
E komishon ta sinta pa un periodo di tres aña konsekutivo. Un miembro di e komishon por sinta un máksimo di dos periodo tras di otro. E komishon Krus di Mérito Kòrsou ta kai bou di e ouspisio di Ministerio di Enseñansa, Siensia, Kultura i Deporte (ESKD). E trabounan ku e miembronan di e komishon ta desplegá, ta tuma lugá riba un base boluntario. E komishon ta keda asesorá pa un sekretariado ku ta konsistí di dos kolaboradó di Sektor di Kultura i Deporte (SKD) i un kolaboradó di Direktorado di Komunikashon i Informashon (DKI) di e ministerio di Asuntunan General. E kolaboradónan di e sekretariado i di DKI no tin derechi di voto.
Lista di e komishonnan i nan distinguido miembronan
Aki ta sigui un bista di e diferente komishonnan ku for di aña 2004 te ku awor a òf ta duna konseho na konseho di minister di pais Kòrsou.
- 2025-2027
- 2025-2027
Sra. Lizette
Sambo-Velder
- Presidente di e komishon
- Representante di e Sektor Kultural-Edukativo
Sr. Glenn
Thomas
- Representante di e Sektor di Media i Komunikashon
Sra. Migdarys
Mercera-Martina
- Representante di e Sektor Ekonómiko
Sra. Camilla
Minguel
- Representante di e Konseho di Hubentut
Sra. Maria
Seferina-Rojas
- Representante di e Sektor di Komèrsio (KvK)
Sr. Roberto
de Lannoy
- Representante di e Konseho di Grandinan
Sra. Judith
Mening
- Representante di e Konseho di Iglesia
Sra. Soraida
Bishop
- Representante di e Sektor Sosial – Kurativo
Sra. Veronica
Thode-Legrand
- Representante di e Sektor Sindikal
Kriterio pa por risibí Krus di Mérito
- E kandidato mester ta bibá na Kòrsou;
- E kandidato mester ta riba sinkuenta (50) aña di edat;
- E kandidato mester ta di un komportashon ehemplar;
- Aparte di su trabou, e kandidato mester a okupá su mes ku aktividatnan ehemplar i na bienestar di nos komunidat, durante di un periodo di mínimo sinku (5) aña;
- E kandidato mester tin prueba di e efektonan di su aktividatnan den nos komunidat.
- Tur aña Gobièrnu di Kòrsou ta pidi pueblo pa presentá kandidatanan pa por risibí Krus di Mérito i di e manera akí un òf mas ko-siudadano ta proponé kandidatonan.
Prosedura di trabou
Sekretariado di komishon Krus di Mérito Kòrsou ta esun enkargá ku e parti atministrativo pa e komishon por risibí tur informashon di e kandidatonan ku ta keda proponé pa risibí Krus di Mérito. E miembronan di komishon Krus di Mérito Kòrsou ta risibí tur e proposishonnan pa kondekorashon ku a kumpli ku kriterionan publiká. Esaki ta sosodé despues ku e sekretariado risibí tur e proposishonnan entregá i a skrutiná tur pa wak si tur e dokumentashon rekerí a ser entregá.
Despues ku kaba di lesa tur proposishon ku a drenta, kada miembro di komishon Krus di Mérito Kòrsou ta argumentá ken ta bini na remarke segun e miembro su skrutinio. Despues e komishon ta pone tur e kandidatonan ku a sobresalí den e proseso di votashon. E proseso aki ta tuma lugá den tres (3) ròndu pa na final, e sinku kandidatonan ku a risibí mas punto despues di e ròndu di votashon, por yega na remarke pa Krus di Mérito. E komishon ta manda un proposishon ku e sinku (5) kandidatonan pa Konseho di Minister di pais Kòrsou. E órgano di estado aki, na su turno ta tuma e desishon final.
Tur aña e komishon Krus di Mérito Kòrsou tin e tarea difísil i alabes noble akí, pa postulá e kandidatonan ku ta keda kondekorá riba dia 2 di yüli ku un Krus di Mérito.
Proponé un kandidato pa Krus di Mérito
Pa por postulá un kompatriota pa risibí e Krus di Mérito tin algun kriterio ku e mester kumpli kuné:
- Bo ta pensa e persona ta kumpli ku e kriterionan pa bin na remarke pa haña e distinshon.
- Bo ta un persona mayor di edat.
- Bo tin nashonalidat hulandes.
- Bo ta biba na Kòrsou.
Si bo ta kumpli ku e kriterionan akí bo por postulá un kandidato pa risibí Krus di Mérito. Esaki ta posibel tur aña durante di un periodo di un luna kompletu. Si bo kandidato ta kumpli ku tur e kriterionan, bo por postul’é pa e por risibí e Krus di Mérito dia 2 di yüli, Dia Di Bandera di Pais Kòrsou. Ta posibel pa un persona postulá mas ku un kandidato.
Bo por postulá bo kandidato ‘online’ pa medio di un formulario. Tambe bo por ‘download’ e formulario akí òf pasa buska esaki na e sekretariado di e komishon Krus di Mérito Kòrsou. Mester yena tur e informashonnan ku mester, pa asina nan por postulá un kandidato pa risibí Krus di Mérito.
E proposishon mester tin e siguiente informashonnan di e kandidato ku ta keda postulá:
- Informashon personal di e kandidato;
- Biografia di e kandidato;
- Un portrèt (pasfoto) resien saká, di bon kalidat, di e kandidato;
- Menshon di e aktividatnan personal, partikular i meritorio di e kandidato;
- E área(nan) i tipo di aktividat ku e kandidato a hasi aktonan meritorio aden.
Deskribí kon e aktividat(nan) tabata partikular i meritorio pa medio di:
- Deskribí si ta pa pais Kòrsou òf un grupo den komunidat di Kòrsou;
- Deskribí e periodo i regularidat di aktividat(nan);
- Deskribí kon e aktividat(nan) tabata un sakrifisio personal;
- Deskribí kon e prestashon tabata di un balor i nifikashon supstansial (trabou di mas ku sinku (5) aña);
- Deskribí kon e prestashon ta di un kalidat haltu;
- Deskribí i entregá prueba di e trabou(nan) partikular i di mérito personal;
- Deskribí i demostrá kon e kandidato ta un persona di bon kondukta;
Despues di hasi entrega di e postulashon di bo kandidato(nan), bo ta risibí un e-mail di konfirmashon di parti di e sekretariado di e komishon Krus di Mérito Kòrsou. Tene na kuenta ku tur postulashon ku no ta digital, mester ta di taip. Lamentablemente komishon no ta aseptá niun postulashon di kandidato na man skirbí.
Kondekoradonan Krus di Mérito
For di aña 2004 te ku awor, Gobièrnu di Kòrsou a otorgá Krus di Mérito na 109 siudadano di pais. Resientemente e siudadanonan di pais Kòrsou aki a risibí meresidamente e Krus di Mérito pa nan trabounan meritorio:
Señora Yvette Elisabeth Rojer
Kondekorá: 2025
Área: Deportivo
Biografia
Señora Yvette Elisabeth Rojer a nase dia 5 di yüni 1953 na Kòrsou. Señora Rojer a dediká su bida na atletismo aki na Kòrsou i tambe riba plano internashonal. For di aña 1983 te ku aña 2003, señora Rojer a representá Antia Hulandes den kampionatonan grandi internashonalmente. Señora Rojer, praktikando e deporte di ‘Basketball’, a representá Antia Hulandes na entre otro ‘Juegos Centroamericano y del Caribe’ na Medellin, Colombia i tambe ‘Juegos Panamericanos’ na Panama.
Despues ku a disolvé Antia Hulandes na aña 2010, señora Rojer a keda aktivo internashonalmente den deporte di atletismo i a guia e atletanan i ekiponan durante torneonan na entre otro Venezuela, México, Puerto Rico i islanan ingles den Caribe.
Señora Rojer a start ku su karera komo ‘coach’ na aña 1982, dunando training na atletanan hóben den e organisashon ‘The Eagles’, ku e mes a yuda lanta. Na aña 1988, señora Rojer a logra su sertifikado di IAAF na Puerto Rico, ku a habri portanan internashonal kaminda e por a fungi komo ‘coach’ riba nivel haltu. El a keda desaroyá su mes pa medio di partisipá (na aña 1990) na un kurso speshal di ‘Special Olympics’ na Jamaica. Señora Rojer a keda komo ‘coach’ di ‘Special Olympics’ for di aña 1989 te aña 2008, kaminda ku el a dediká su mes di duna muchanan spesial training pa por kompetí i presta riba nivel haltu.
Internashonalmente tambe, señora Rojer a guia atletanan durante kompetensia nan di ‘Carifta Games’ for di aña 1984 te aña 2010 na Bahamas, Barbados i Jamaica. Aparte di esei, señora Rojer tabata ‘coach’ tambe den kampionatonan na Hulanda, Bèlgika i Alemania for di aña 1997 te aña 2007.
Señor Ruthsel Gregorio Martina
Kondekorá: 2025
Área: Deportivo
Biografia
Señor Ruthsel Gregorio Martina a nase dia 12 di mart 1956 na Kòrsou. Señor Martina ta un figura prominente den e mundu di deporte di Kòrsou i tambe den eksterior. Dor di su konosementu tékniko, señor Martina a kuminsá su karera profeshonal na ‘Dienst Water en Energie Productie’ (D.W.E.P) na aña 1971 kaminda, ku finalmente el a krese bira kordinadó di kamber di kontròl i di servisio di ‘Storing’ na Aqualectra awendia. Su disiplina fuerte ku e tin i kualidatnan di liderato, a keda desaroyá temporada ku e tabata militá den e organisashon di ‘Jonge Wacht’ komo hóben, loke a kondusí na un base fuerte p’e komo lider i coach den e mundu di atletismo.
Bou di guia di ‘coach’ Norwin Martina, señor Martina a spesialisá su mes den korementu di distansia largu. Ta for di su 16 aña el a kuminsá train ku seriedat den atletismo. Señor Martina a sobresalí den diferente disiplina i a logra resultadonan impreshonante durante kompetensia nan lokal i internashonal. Señor Martina a representá Kòrsou i Antia Hulandes durante diferente torneonan internashonal entre otro; weganan di reino na Sürnam, Venezuela, México, Barbados, Trinidad & Tobago i den ‘Carifta Games’ na Puerto Rico.
Na aña 1989, señor Martina a lanta e klup di atletismo ‘Trupial’ ku a establesé mas den e bario Sta. Rosa i Bonam. Loke ku a kuminsá komo un klup di bario a krese bira un dje klupnan di atletismo mas eksitoso di Kòrsou. Bou di su guia, e klup a gana diferente premio i a partisipá den diferente kompetensia regional i internashonal. Ta for di Trupial a sali atletanan hóben ku a bin ta destaká i saka kara di Kòrsou. Entre nan ta figurá e atleta Leimarvin Bonevacia i nos strea mundial, Churandy Martina.
Dor di señor Martina su pashon i deseo di amplia konosementu den atletismo, el a profundisá su mes den esaki logrando entre otro su sertifikado di IAAF nivel 4.
Señora Ella Zacarias Snijders
Kondekorá: 2025
Área: Sosial
Biografia
Señora Ella Zacarias Snijders a nase dia 6 di sèptèmber 1957 na Kòrsou. Señora Snijders, pa esfuerso personal, personalidat amistoso i determinashon, a logra bira un boluntario ehemplar den nos komunidat.
Durante di su estudio, na e skol Maria Immaculata Lyceum (MIL), ya señora Snijders tabata un boluntario aktivo den diferente organisashon di hóben, prinsipalmente den e bario di Buena Vista. Despues di su estudio señora Snijders a kuminsá su karera na NCR, seguidamente un funshon na kompania Ernst & Young. Aki el a spesialisá su mes den e área di maneho finansiero, komunikashon i maneho di personal.
For di aña 2015 señora Snijders ta aktivo komo boluntario na e fundashon ‘Slachtofferhulp Curacao’ (SSHC) i awor mihó konosí komo UOJZ. El a traha ku klientenan difísil i vulnerabel ku tabata yega pa yudansa ku hopi biaha ta víktima di delitonan manera problemanan relashonal, abuso seksual òf víktima den tráfiko. E dedikashon ehemplar di señora Snijders ta enserá duna guia emoshonal i asistí klientenan den korte, yudando ku formulashon di rapòrt di daño perhuisio i proseduranan hurídiko. Tur esaki, señora Snijders ta hasi ku un pasenshi enorme, demostrando empatia i abilidat di skucha sin husga.
Durante di e periodo di pandemia di ‘Covid-19’, señora Snijders a pone su mes disponibel pa yuda den akshonnan pa haña kuminda via banko di kuminda. Apesar di e situashonnan difísil ku tabata reina, tòg el a sigui yuda inkansablemente den komunidat. Señora Snijders tabata yuda riba diferente tereno, entregando paketenan di kuminda i dunando sosten durante situashonnan krítiko.
Tambe señora Snijders, ta okupá su mes ku e organisashonnan sosial i deportivo manera fundashon ‘Special Olympics’ i ‘Antilliaanse Jongens en Meisjes Gilde’ (AJMG).
Señor Harold Eustaquio Corasol
Kondekorá: 2025
Área: Sosial i Edukashon
Biografia
Señor Harold Eustaquio Corasol a nase dia 2 di novèmber 1942 na Kòrsou. Señor Corasol ta un lider konosí na Kòrsou ku ta kapasitá entre otro komo trahadó sosial, ku un bida kompleto dediká na e komunidat di Kòrsou. Despues di su estudio, Señor Corasol, komo dosente na aña 1961, a kuminsá su karera na e skol Canisius College den e bario di Steenrijk.
Na aña 1967, señor Corasol a drenta servisio komo dosente di e materianan Franses i Historia na e skol Monseñor Zwijsen College, kaminda el a traha su nòmber komo un dosente ku semper ta kla pa yuda tantu su alumnonan komo koleganan. Su kualidatnan komo lider a guia ku a señor Corasol komo direktor di e skol akí. Bou di su guia e skol a krese enormemente ku énfasis riba disiplina, traha huntu i aktividatnan kultural.
Señor Corasol tabata atendé tambe ku produkshonnan teatral eksitoso manera ‘Esta Riku nos bida ta’ i ‘A nase un mas’, ku a hasi un impakto den e mundu di enseñansa. Banda di su karera komo dosente, señor Corasol tabata hopi aktivo den komunidat. El a pone su skoudernan bou di e koperativa pa dosentenan, e organisashon di ‘zee verkenners’ i diferente otro inisiativa kultural.
Den e sektor kultural señor Corasol a partisipá den ‘Nos Kousa’. Esaki tabata un organisashon dirigí riba obranan teatral ku temanan sosial. Un dje grandinan tabata e komedia ‘TULA’ ku huntu ku señor ‘Pacheco’ Domacasse (†), a keda produsí bou di direkshon di e famoso Henk van Ulzen.
Señor Corasol a yuda tambe e grupo ku yama ‘Yukondro’ ku tabata sostené i yuda esnan ku tabata adikto na droga. Un dje kontribushonnan importante tambe di señor Corasol ta, su yudansa te ainda, den e fundashon ‘Nos T’ei pa Yuda’. E organisashon akí, ta yuda esnan ku no tin dak riba nan kabes i tambe drogadiktonan.
Señor Romeo Raymond Heije
Kondekorá: 2025
Área: Músika i Edukashon
Biografia
Señor Romeo Raymond Heije a nase dia 24 di mart 1950 na Kòrsou. Señor Heije ta un dje kantantenan i músiko mas gustá di Kòrsou. For di aña 1964, señor Heije a kuminsá partisipá aktivamente den e mundu farandulero lokal i a militá den diferente banda musikal entre otro ‘Los Dandies’, ‘The Blues’, ‘The Magic Stars’, ‘Super Speshal Combo’, ‘Super Dynamic’, ‘Doble R Super Special Stars’ i otronan.
For di aña 1982 te ku aña 1987, señor Heije a fungi komo direktor i dosente di skol di músika Band’abou. Na aña 1988, señor Heije a disidí di bai Hulanda pa amplia su konosementu musikal. Entre e añanan 1988 pa 1991, señor Heije a sigui kurso na konservatorio na Arnhem unda, ku el a spesialisá su mes den músika pa skol i kanto general i alabes a kaba su estudio na nivel di HBO komo dosente. Despues di su estudio, señor Heije a traha na Hulanda komo guiadó den proyektonan pa personanan ku ta yega nobo pa integrá nan mes (PIN) i tambe guiadó di trayektonan na ‘Hellevoetsluis’ entre e añanan 1991 pa 1995 (V.I.P.)
Despues di señor Heije su regreso na Kòrsou el a bira e lider i kordinadó di e proyekto musikal sosial na internat Kas pa Hubentut na Soto unda na aña 1997 el a kordiná e bishita di prens Willem Alexander. Aparte di esei, señor Heije a traha tambe komo dosente di músika na Akademia Pedagógiko Kòrsou for di aña 1997 te ku 2002. Señor Heije ta trahando na fundashon SIFMA komo dosente di kanto. Tambe señor Heije ta dunando lès di músika i kanto na sentro di bario Souax te asta dia di awe. Señor Heije a duna lès na Fundashon Pro Bista i a desaroyá dos dokumento ku método pa guia dosentenan ku ta duna lès na klientenan ku limitashon visual.
Despues di baha ku penshun na aña 2010, señor Heije a keda aktivo komo boluntario den e sektor musikal. Sigur den e área musikal, señor Heije ta un ehèmpel ku sigur por stimulá tur hende, ku maske ku bo por tin un òf otro limitashon físiko, esei no mester ta un estorbo pa bo logra niun meta. Ku determinashon i perseveransia bo ta logra.
Dokumentunan
Aki bo ta haña e dokumentonan relevante relashoná ku Krus di Mérito. Si bo ta buska un dokumentu ku no ta visibel den e lista, por tuma kontakto ku nos na [email protected]
Galeria Krus di Mérito
Durante e añanan di otorgamentu di Krus di Mérito a traha momentunan inolvidabel. Den e Galeria Krus di Mérito por enkontrá un kantidat di potrèt i video pa inmortalisá e momentunan aki.
Señor Ludwig Richard Samson
Señor Cedric Charles Victor Ridderplaat
Krus di Mérito di e hende hòmber
