Kondekorá: 2018

Área: Polítiko (inisiadó di idea Krus di Mérito )

 

Biografia

Señor Rignald Calixto Lak a nase dia 14 di òktober 1960 na Kòrsou. Komo mucha nasé den e bario di Buena Vista, señor Lak a sigui estudionan avansá na Kòrsou pa despues laborá 35 aña na Kodela/Aqualectra.

 

Señor Lak tabata miembro di Konseho Insular di Kòrsou na añanan 1995, 1999 i 2003. E tres periodonan aki ta totalisá 12 aña di gobernashon. Den e periodo di 2003 pa 2004 señor Lak tabatin e privilegio pa sirbi nos pais komo diputado di asuntunan general, personal i struktura estatal.

 

Na 1997, inspirá pa Kreador i Dios Tata Todopoderoso señor Lak, un persona konsistente den tur lokual ku e ta kere ku por kontribuidó pa krea un mihó nashon, i kumpliendo dignamente ku su labor, komo miembro di Konseho Insular di Kòrsou, a inisiá ku e idea pa Gobièrnu di Kòrsou, instituí un distinshon diferente for di gobièrnu sentral. Gobièrnu sentral tabata tin e kondekorashon di Reino Hulandes, ‘Ridder in de Orde van Oranje Nassau’, kaminda ta kondekorá personanan i/òf baluartenan ku den un òf otro ramo a desplegá trabounan meritorio pa e isla di Kòrsou. E tempu ei, Gobièrnu di Kòrsou a risibí e petishon di señor Lak i a bai di akuerdo ku e proposishon di “Krus di Merito”.

 

Señor Lak a keda lucha inkansabelmente te na momentu ku el a mira e promé baluartenan keda kondekorá na aña 2004. Asin’aki e distinshon di mas haltu di pais Kòrsou, Krus di Mérito, a keda ortogá na nos baluartenan for di aña 2004 konsekutivamente, poniendo Kòrsou su héroenan den lus pa asina inspirá otronan pa yuda den e proseso di edifikashon di nos nashon.

 

Ta konsiderá señor Lak un berdadero patriota ku ta stima su próhimo i su pais. Pa tal motibunan Komishon di Krus di Mérito a proponé pa señor Rignald Lak, na okashon di e di 15 edishon di Krus di Mérito, risibí e Krus di Mérito na aña 2018 pa e logro duradero aki.

Kondekorá: 2014

Área: Kultural / Scouting

 

Biografia

Señor Marwin Engracio Ricardo a nase dia 3 di aprel 1954 na Kòrsou. Señor Ricardo ta un bon konservadó di kultura, kaminda e ta trese esaki bèk pa hóben i adulto. Fuera ku e ta duna informashon, e ta buska informashon tambe serka grandinan ku konosé nos kultura. Su obranan a keda usá komo método den enseñansa di Fundeshi.

 

Señor Ricardo ta tambe skout pa mas ku 25 aña den área di Bandabou. Aki e ta yuda hóbennan riba nan desaroyo físiko, sosial, mental i spiritual. Hopi ta e hóbennan ku a bira adultonan responsabel den nos komunidat pa medio di e desaroyo akí.

 

Mas aleu señor Ricardo ta dediká su mes na plantashon i na momentu ku tin kosecha, e ta gradisí señor ku suplamentu di kachu, i medionan di komunikashon ta graba e aktividat aki i laga komunidat mira kon tabata selebrá Seú ántes. Señor Ricardo ta un persona ku ta biba ku nos kultura i ta traspas’é pa nos komunidat en general, pero spesialmente pa nos hóbennan en partikular.

Kondekorá: 2006

Área: Sosial / Religioso

 

Biografia

Señor Darcy Julian Lopes a nase dia 31 di òktober 1945 na Kòrsou. Ku e diferente kursonan di ‘Papia den Públiko’ el a funda diferente klup di ‘Toastmaster’ na Kòrsou. Esaki a yuda hóben i adultonan ku e abilidat di papia den i pa un públiko grandi sin problema i sin miedu. E klupnan di servisio akí, ta hasi trabounan boluntario. Di e forma akí, señor Darcy a stimulá mas hende pa hasi trabou boluntario.

 

Na aña 1987, komo úniko antiano, el a partisipá na ‘Toastmasters International Worldwide Taped Speech Contest’ i a logra e segundo lugá. E ta yuda hopi yu di Kòrsou ku e abilidat pa komuniká.

 

Ademas e tabata aktivo den Konseho di Iglesia i ta yuda boluntariamente ku hopi otro trabou ora hasi un yamada riba dje.

Kondekorá: 2023

Área: Deporte / Konservadó di naturalesa

 

Biografia

Señor Ryan Antony de Jongh a nase dia 15 di mart 1971 na Kòrsou. Den un reunion kaminda a splika ku nos bahianan un tempu tabata kolmá ku palu di mangel (mangroves), pero lamentablemente esakinan a ser di kap i eliminá den temporada di siglonan pasá. Motibu di esaki tabata, ta pa por a traha ‘zoutpannen’ pa por a kosechá salu di laman. Tambe a splika ku e naturalesa no a rekuperá nunka mas i nos a pèrdè kas shen porshento (100%) di nos palu di mangelnan. Señor de Jongh a puntra dikon no ta planta e palunan di mangel aki bèk? E kontesta den e reunion ei tabata, ku esei nunka a yega di sosodé i ku esaki probablemente lo ta algu ku no lo por. Señor de Jongh no a keda kontentu ku e kontesta i e la disidí na hasi algu na e situashon.

 

Awendia, 17 aña despues nos por konstatá, ku boluntariamente señor de Jong a re-plantá na nuebe (9) bahia di Kòrsou e palunan di mangel. Di e kasi shen porshento (100%) ku a disparsé, el a logra di re-plantá kasi ochenta porshento (80%) bèk. Señor de Jongh a planta su promé palu di mangel den e bahia di Piscadera. E la sigui planta den e bahia di Waaigat, na Nieuwe Haven, Sint Jorisbaai, Boca Sami, Sami Liber i Spaanse Water. Tambe el a planta un par den e bahia di Willibrordus na altura di Rif Sint Marie.

 

Den koperashon i ku finansiamentu di Deloitte Dutch Caribbean, señor de Jongh ta terminando e plantamentu di e palunan di mangel. Señor de Jongh a inisiá un proyekto piloto den e bahia di Boca Sami/ Sami Libu. Despues di Sami Libu lo re-plantá tambe den e sobrá bahianan.

 

Un nota interesante den esaki ta ku señor de Jongh den koperashon ku Deloitte Dutch Caribbean, ku pèrmit di Gobièrnu di Kòrsou, lo re-plantá na Klein Kòrsou tambe.

 

Otro prestashon balioso di señor de Jongh tabata su biahe ku el a hasi den un kayak rondó di pais Kòrsou na aña 2007, ku e meta prinsispal pa rekoudá fondo pa e fundashon Carmabi. El a bolbe ripiti e akto aki na aña 2009, pero e biaha aki, señor de Jongh a hasi su biahe saliendo for di pais Sint Maarten den su kayak ku destinashon pais Kòrsou. E akto aki, tabatin un durashon di bintidos (22) dia largu i e ruta total tabata 2800 kilometer.

Kondekorá: 2016

Área: Edukativo / Sosial 

 

Biografia

Señora Diodela Maria van Weissenbruch-ter Haar a nase dia 12 di sèptèmber 1932 na Kòrsou. Señora van Weissenbruch-ter Haar for di edat di tiner a keda detektá ku desabilidat di oido. E desabilidat akí, no a strob’é pa e sigui su estudio, finalisá esaki i traha komo maestro di skol speshal.

 

Ku hopi energia i dedikashon señora van Weissenbruch-ter Haar a traha mas ku 40 aña boluntariamente pa yuda mucha i miembronan di nos komunidat ku ta surdu. E a fungi komo sekretaria di H.A.G. (Hulp aan Auditief Gehandicapten) i sekretaria di Raad van Gehandicepten for di aña 1979 te ku aña 1994.

 

Señora van Weissenbruch-ter Haar tabata hopi envolví ku preparashon di e internat ‘Fundashon Kas pa Mucha Surdu Brakapoti’, pa muchanan surdu i esnan ku no ta tende bon ku no tabata haña sufisiente guia i atenshon na kas na Kòrsou i Boneiru.

 

Tambe señora van Weissenbruch-ter Haar a aportá ku artíkulonan pa e revista pa e komunidat surdu “DESIBE”. E tabata organisá diferente aktividat sosial pa e komunidat surdu. Semper señora van Weissenbruch-ter Haar batata tin e pashon pa yuda e personanan ku desabilidat di oido i konsistentemente e tabata hasi petishon pa yuda e miembronan di komunidat akí na Kòrsou i na Boneiru.

Kondekorá: 2011

Área: Kultura

 

Biografia

Señor Juan Vicento Bartholomeus a nase dia 24 mei 1929 na Kòrsou. Señor Bartholomeus, mihó konosí komo ‘Shon Vikto’, ta un di e grandinan di Kòrsou ku a traspasá nos historia i kultura pa e generashon mas hóben. Hasiendo esaki e tabata eduká nos komunidat riba e área di kultura, norma i balornan. Di e forma akí Shon Vikto kier a konsientisá nos muchanan en espesial riba nos kultura riku i nos identidat kurasoleño.

 

Ademas señor Bartholomeus a sòru pa organisashonnan manera Unesco, Kas di Kultura, Museo Tula i otronan haña informashon masha balioso di nos historia i kultura. Shon Vikto tabata un di e pokonan ku tabata kanta i baila kantika di trabou (kantikanan ku ta kanta ora ta traha den kunuku i/òf riba plantashi).

 

Pa sigui promové nos kultura, Shon Vikto i su famia a lanta un museo na Soto ku ta karga su nòmber. Tambe su famia ta mantené e tradishon di pan será, pan dushi i kuminda krioyo trahá i kushiná na kas den e sistema di ántes.

 

Señor Juan Vicento Bartholomeus a fayesé dia 9 di mei 2016.

Kondekorá: 2021

Área: Sosial / Literatura / Idioma

 

Biografia

Señora Maria Cecilia Diwan a nase dia 30 di sèptèmber 1939 na Kòrsou. Señora Diwan a kuminsá traha ku 16 aña komo sekretaria serka famia Pinedo. Pa 61 aña largu “Mama Maria”, manera tur e empleado nan tabata yam’é, a sirbi e empresa. Den su oranan liber e tabata organisá eventonan pa e trahadónan di e kompania Coca Cola aki na Kòrsou i el a pèrkurá pa e empleadonan tin plaser den nan trabou.

 

Señora Diwan tabata stima su trabou i tabata traha ku amor i tabata masha dediká. El a disidí ku e no ta baha ku penshun, pero sigui duna su grasia na su trabou pa medio di su presensia ku e ta iluminá e empresa kuné. Por bisa ku den silensio e ta yuda hopi persona ku tin nesesidat finansiero, sin a dibulgá esaki.

 

Señora Diwan ku su stèm trankil i sin igual, ku tur hende konosé pa medio di su programa radial “Den Kibrá di Mardugá” ku ta masha inspirativo, ta drecha tur radio oyente su dia.

 

Señora Diwan tabata yuda hopi hende di terser edat moral i ekonómikamente. Tambe señora Diwan ta organisá, pa esnan ménos pudiente, sena di Pasku ku un regalo simbóliko aserka.

 

Señora Diwan a skirbi diferente buki pa mucha i poesia den nos dushi idioma papiamentu i ku esaki e ta mustra pa años kaba, ku e ta protektor i defensor real di nos dushi lenga Papiamentu. Señora Diwan a enrikesé i engrandesé nos literatura nan ku diferente produkshon manera: Chimichimi, Solo ta sali pa abo tambe, Union muhé Antiano, Awa fresku i hopi mas.

Kondekorá: 2014

Área: Sosial edukativo

 

Biografia

Señor Gregor George Schoop a nase dia 10 di yanüari 1964 na Kòrsou. Señor Schoop ta un persona masha ehemplar den bario di Santa Helena. E ta konosí komo un persona masha sosial, ku gusta organisá i yuda.

 

Durante di su añanan komo studiante den Konseho di Alumno, regularmente e tabata organisá enkuentronan sosial pa studiantenan na Hulanda. E tabata yuda studiantenan ku yega Hulanda integrá den e bida di studiante na Hulanda. 

 

Na Kòrsou e ta hasi trabou boluntario riba diferente área pa kontribuí na edifikashon di bario di Santa Helena. E ta hasi esaki organisando aktividatnan manera: Dia di St. Helena; pa lanta kòntròl sosial bèk i trese abitantenan huntu; limpiesa di bario; yuda abitantenan den nesesidat i formashon despues di skol pa Skol di Fundeshi.

 

Señor Schoop ta sinti su mes yamá pa duna un aporte na desaroyo di bario di Santa Helena, kaminda el a nase, krese i ta biba awendia ainda.

Kondekorá: 2009

Área: Deporte / Músika

 

Biografia

Señor Franklin (Frank) Isaias Curiel a nase dia 6 di yüli 1945 na Aruba. Na un edat hóben, señor Curiel a kuminsá práktika deporte den bario di Sta. Maria na Kòrsou. Na aña 1965 huntu ku algun amigu el a funda e ekipo di beisbòl ‘Sta. Maria Giants’. Komo lider di hubentut señor Curiel ta dirigí i entrená ekiponan di sòftbòl i beisbòl di hóben i adulto. Pa medio di e deporte di beisbòl señor Curiel a entrená hopi hóben i awe nos por mira resultado di e bon trabou akí den forma di tur e premionan ku e hóbennan ta trese pa Kòrsou. Ademas hopi di e hóbennan akí, a bira beisbòlistanan profeshonal ku ta hunga den Liga Mayó na Merka.

 

Riba e tereno di kultura, tambe señor Curiel a duna gran kontribushon. El a dirigí vários agrupashon musikal manera ‘Las Mas Modernas’, kual tabata un grupo di aguinaldo, ‘The Six Dimention’, ‘Latin Steel Combo’, ‘Sugar Ice Tea’, i ‘Curiel and Friends’.

 

Aktualmente señor Curiel ta penshonado, pero e ta sigui traha ku mesun amor pa e deporte di beisbòl i sòftbòl. Ketu bai diariamente señor Curiel ta trein hóbennan den siman na Curiel Chirino Ballpark ántes Sta. Maria Ballpark.