Kondekorá: 2020

Área: Deporte

 

Biografia

Gladwin Lumeno de Lanoi a nase dia 4 di novèmber 1944 na Kòrsou. Na aña 1980 señor de Lanoi a kuminsá den e deporte di natashon, dor di hiba su yunan lès di landamentu pa despues hinka nan den klup di natashon Buladó Swimming Club. Na 1981 el a bira coach asistente di e tòp landadonan di e klup. Despues di esaki, señor de Lanoi a bira wes di e deporte, kaminda pa su imparsialidat i kurashi demostrá, el a wòrdu inkorporá den bònt di Karibe i Centro Amerika (CCCAN) komo miembro tékniko te ku 2019.

 

Pa tur su trabounan boluntario ku señor de Lanoi a duna na e mundu di natashon el a keda rekonosé na diferente okashon komo wes di aña i instalá den Salon di Fama di FDOK i nominá komo miembro honorario di klup Buladó i nominá komo miembro honorario di CCCAN.

 

Na aña 1983, mirando ku Klup Buladó tabatin mester di representante den e kuerpo di ofisial, señor de Lanoi huntu ku dos mayor mas a sigui e kurso pa ofisial. Denter di un korto tempu, mirando su dedikashon, el a subi bira un di nos rèfrinan. Señor de Lanoi su promé kompetensia internashonal tabata na aña 1986 den kompetensia di Caribbean Island Swimming Championships aki na Kòrsou komo rèfri.

 

Señor de Lanoi a traha den hopi kompetensia internashonal di natashon komo rèfri i asina yamá wes di estilo na Aruba, Boneiru, Hulanda, Republica Dominicana, Puerto Rico, Trinidad & Tobago, Bahamas, Jamaica, Cuba, Venezuela, Colombia, México, Panama, Salvador, Guatemala, Argentina i Australia.

 

Na aña 2014, CCCAN a bolbe eligí señor de Lanoi pa un periodo di 5 aña mas te ku 2019. Riba su propio forsa el a partisipá na 4 kongreso internashonal pa FINA.

 

Banda di natashon señor de Lanoi ta hasi trabounan boluntario na e skolnan básiko Emanuel i John F. Kennedy.

Kondekorá: 2014

Área: Edukativo / Kuido

 

Biografia

Señora Margaretha Steodula Andrea a nase di 3 di mei 1945 na Kòrsou. For di mucha señora Andrea tabatin un pashon pa yuda su próhimo. El a traha inkansabel pa mucha i hóben na Kòrsou. Nan a haña bon edukashon, kuido i guia durante e temporada ku señora Andrea tabata traha na Huize St. Jozef.

 

Señora Andrea a tuma diferente mucha i hóben na su kas ora ku nan no por bai nan kas den wikènt òf den fakansi. Ademas el a kontribuí ku artíkulonan di nesesidat i regalo pa hóbennan na okashonnan spesial. Siendo penshonado, ainda señora Andrea ta yuda boluntariamente ku mucha i hóbennan di Huize St. Jozef, ora nan hasi petishon na dje.

 

Señora Andrea tabata esun ku a trèk i kordiná e proyekto di ‘Telefòn pa Mucha i Hóben’, 918 pa Stichting Kinderbescherming Curaçao i asina hasi esaki bira realidat na Kòrsou. Mucha i hóbennan ku tin un problema i ku no tin niun hende pa papia kuné òf ke papia anónimo, por yama e liña di telefòn ‘918’.

Kondekorá: 2008

Área: Sosial / Rekreativo

 

Biografia

Señor Lucio Alberto Romero a nase dia 25 di yüni 1934 na Kòrsou. Señor Romero ta kariñosamente yamá Lucio òf Yuchi. Den tur forma señor Yuchi tabata duna aporte boluntariamente na aktividatnan na bienestar di hendenan den nos komunidat. Pa mas ku 40 aña señor Yuchi tabata aktivo den Fundashon Ayudo Sosial. Komo shofùr e tabata hiba muchanan lès di kòmpiuter, aktividatnan speshal i ‘Special Olympics’. Tur esaki pro deo.

 

Ademas señor Yuchi a aportá den trabou ku adiktonan, kaminda e tabata buska lugá pa e hendenan akí haña kuminda i un lugá pa nan drumi. Señor Yuchi no por tende di mucha òf hende grandi den nesesidat, ya e tei kla pa yuda. Señor Yuchi ta un bon dirigente, pasobra e ta inisiá e trabou i otronan ta sigui.

 

Tur kaminda ku señor Yuchi mira ku mester di su aporte e ta lora manga di kamisa i hasi e trabou nesesario na bienestar di su próhimo.

Kondekorá: 2023

Área: Sosial / Rísiko i kalamidat

 

Biografia

Señor Curd Lawrence Evertsz a nase dia 1 di novèmber 1960 na Kòrsou. Su nòmber den komunidat di Kòrsou ta Curd di Citro. Su edukashon ku un background mediko a sirbi tremendamente bon den parti kontenido di su trabounan.

Strategia i direkshon pa un organisashon manera Prinses Wilhelminafonds ta importante, i ei ta kaminda señor Curd a yuda. Señor Curd a yuda den funshon di direktiva di e fundashon Ride for the Roses. Señor Curd ta wordu mirá komo un di e pilarnan di Citro, e organisashon ku ta kla pa sirbi 24/7 pa kasonan di emergensia riba laman. E a wòrdu aserká pa sirbi despues di a desplegá trabounan grandi, kompliká i kompleho ora di e aksidente riba laman ku e lancha Scorpio kaminda 7 persona tabata pèrdí riba laman. Pa ku esaki Señor Curd a organisá un búskeda grandi usando su abilidatnan di strategia i maneho, su ‘netwerk’ pa generá fondonan i trese un helikòpter for di afó pa bin amplia e flota di búskeda aéreo.

Curd a sirbi 23 aña riba nivel di direktiva dunando direkshon den struktura di maneho den ‘fundraising’, den komunikashon, den maneho di kasonan grandi komo kapitan ouksiliar, buseadó i landadó di reskate i negoshadó ku partnernan grandi tantu lokal komo internashonal.

Señor Curd pa último dékadanan ta un kara konosí den e mundu di ora ta trata di desasternan ku toka nos pais. For di añanan 90 tempu ku orkan Luis a pasa isla ariba, e a yuda den esaki. Te ku awe señor Curd ta sirbi su pais Kòrsou konsehando i yudando dirigentenan den ‘rampenstaf’ nashonal. Pa nos no pèrdè komunikashon den tempu di desaster señor Curd a lanta su mes fundashon kual ketu bai ta eksistí ya pa 25 aña kaminda ku sistemanan di komunikashon via di satélite por brinda solushon al instante pa keda den aire.

Señor Curd  ta ko-fundadó di Ride for the Roses. Trahando na Guardian Group/Fatum e a kombertí Fatumloop den un evento grandi manera KLM Marathon Kòrsou i Aruba. Tambe señor Curd a aportá na ‘clientenraad’ na Sint Elizaneth Hospital (SEHOS) despues CMC, den non-profit film Curaçao, na underwater kunuku, na The Distinguished Gentleman’s Ride i diferente kos hopi mas.

Señor Curd tin komo karakterístikanan entre otro su integridat, abilidat pa duna direkshon i liderazgo

Kondekorá: 2018

Área: Edukativo / Sosial

 

Biografia

Señor Bentley Roland Leonora a nase dia 19 di ougùstùs 1955 na Kòrsou. Despues di a kaba su studio avansá señor Leonora a traha den enseñansa na skol básiko Jo Corsen na Brievengat i despues na Prins Bernhardschool. Komo kabes di skol na Prins Bernhardschool señor Leonora a tene porta habri pa tur mucha, tantu muchanan di mayornan lokal i estranhero. Huntu ku su tim señor Leonora a sa di traha riba un sistema pa inkluí e muchanan den nos sistema di enseñansa ku éksito.

 

Tambe señor Leonora a inisiá diferente proyekto na e skol aki, manera edukashon despues di ora di skol ku atenshon speshal riba guia di tarea di skol (huiswerkbegeleiding) bou di guia di dosentenan di skol, kuminda kayente pa tur mucha ku ta keda skol pa sigui trayektonan di formashon, un lokal multifunshonal ku 16 kòmpiuter i un biblioteka na skol.

 

Señor Leonora a sigui buska fondo pa por mantené loke el a logra dor di renobashon di e edifisio di skol. Prins Bernhardschool tabata e promé skol ku tabatin kòmpiuter den kada klas, internèt i bòrchi di skol digital.

 

Na momentu ku señor Leonora a baha ku penshun el a sigui yuda den e trabounan di edukashon despues di ora di skol. Señor Leonora tabata 40 aña den direktiva di Azucar Baseball Team i den organisashon di ‘Little League’ di Tra’i Seru. Tur momentu señor Leonora tin orea pa su muchanan i nan ta sintinan liber pa ekspresá serka dje.

Kondekorá: 2013

Área: Deporte

 

Biografia

Señor Aubrey Errington Linzey a nase dia 17 febrüari 1939 na Aruba. Na aña 1954, señor Linzey a bin biba na Kòrsou, kaminda el a bishitá “Ambachtschool” (ramo tékniko) i despues “Bedrijfschool” na Shell Curaçao N.V.

 

Komo un persona ku gusta deporte el a praktiká vários ramo di deporte manera futbòl, bowling i atletismo. Te ainda señor Linzey ta enbolbí den e deporte di atletismo komo ofishal. El a sòru pa bou di su guia nos produsí atletanan konosí manera; Rudsel Martina, Churandy Martina i otronan. Señor Linzey ta esun ku ta yega vèlt promé i e último ku ta bai kas.

 

Señor Linzey a forma parti di diferente organisashon den puestonan di ofishal, rèfri, presidente i lider di delegashon. Tur esaki banda di su trabou na Shell.

 

Semper señor Linzey ta hasi su parti ku dedikashon pa e tin resultado satisfaktorio pa esnan ku e ta traha p’e. Tambe e ta yuda Fundashon Pro Bista boluntariamente.

Kondekorá: 2005

Área: Sosial / Sindikalismo

 

Biografia

Señora Elsa Juliana Martijn a nase dia 8 di mart 1925 na Kòrsou. Apesar di su edat, señora Martijn tabata aktivo komo boluntario riba e área di edifikashon / trabou di bario. E tabata miembro/partisipante den diferente organisashon ku ta traha na bienestar di barionan manera Monte Verde, Berg Altena i Coronet.

 

Señora Martijn a fungi hopi aña komo mediadó i bosero di e barionan akí, na momentu ku mester a defendé i traha pa e abitantenan. Komo un hende ku ta para pa loke e ta bisa, e tabata motivá hopi habitante pa sali dilanti pa nan derechi.

 

Señora Martijn tabata sòru semper pa yuda eduká estranheronan ku ta bin biba den bario riba nos kustumbernan i sistema di kombibensia, pa nan integrá mas fásil. Banda di esei, siendo un mama, semper e tabata duna atenshon na e hóbennan di bario i bisindario, ku ta adikto.

 

Señora Elsa Juliana Martijn a fayesé dia 23 di ougùstùs 2024.

Kondekorá: 2022

Área: Sosial / Kultural

 

Biografia

Señora Violet Lutarca Mathilde Ravenstein-Lourens a nase na Kòrsou dia 28 di yüni 1949. Señora Ravenstein-Lourens a hasi su edukashon sekundario na Radulphus College, siguí pa Akademia Pedagógiko Kòrsou (APK) unda el a optené su ‘hoofdakte’ pa ehersé e profeshon di maestro di skol. For di aña 1970, el a traha na diferente skol básiko aki na Kòrsou i a finalisá su karera komo maestra na aña 2001 komo kabes di Sint Luciaschool na Bonam. Despues e tabata funshonario di direktiva di skolnan Katóliko te na su penshun na aña 2009.

 

Komo kabes di skol na Bonam, un di e barionan ménos pudiente aki na Kòrsou, señora Ravenstein-Lourens a organisá diferente aktividat finansiá for di su propio pòtmòni pafó di orario di skol manera: kurso pa traha tarea di kas (huiswerkcursus), lès di muzik, lès di baile, lès di kushinamentu i drama. E tabata konsiderá e hóbennan di Bonam komo su yunan i den bario nan tabata yama nan ‘muchanan di yùfrou Viola’. Señora Ravenstein-Lourens tabatin atenshon tambe pa mayornan di e muchanan di bario di Bonam i tabata organisá kursonan tokante trahamentu di presupuesto pa asina yuda nan manehá nan fondonan limitá.

 

Komo persona imbolbí ku bario di Bonam, señora Ravenstein-Lourens a fungi 9 aña komo presidente di sentro di bario Bonam. Te awe tin habitantenan di Bonam ku ta gana nan pan di kada dia pa medio di kursonan ku nan a sigui na sentro di bario Bonam.

 

Señora Ravenstein-Lourens ta talentoso komo eskritor tambe. El a publiká un seri di kuenta yamá ‘Awaseru di kuenta tomo 1 te ku 5’ i un seri di poesía i un CD musikal yamá ‘Karakter’. Tambe Señora Ravenstein-Lourens a skirbi dos buki: ‘ik ben zwart’ i un kolekshon di poesia ‘gota for di butishi di bida’. Den siman di buki, semper e ta koperá pa konta kuenta na diferente skol.

 

Komo penshonado, señora Ravenstein-Lourens ta ketu bai aktivo. El a funda grupo ‘Alconsivi’, un grupo di personanan mayor di 50 aña di edat ku e meta pa trese alegria, konosementu i sivismo. E grupo aki a hasi donashon na entre otro Fundashon Alton Paas i a yuda instansianan kumpra kuminda salú pa nan klientenan. Señora Ravenstein-Lourens ta pará na kuna di e grupo Positivo ku e meta pa trese kontra balansa na e negativismo ku tabata reina na Kòrsou. El a lanta e grupo Ekspresá pa trese literatura ekspresivo na públiko. El a funda PROMUSED, un fundashon pa promové músika edukativo pa hóben. Ku esaki el a stimulá kanto serka mucha, stimulá bon komportashon pa medio di kanto i duna atenshon na alumnonan.

 

Señora Ravenstein-Lourens ta e motor tras di ‘kor maestronan penshoná’, un kor di maestronan penshonado ku a hasi diferente presentashon den públiko kantando spesialmente kantikanan ku nos muchanan tabata kanta ántes na skol. Di aña 2009 te ku 2014 el a organisá, tur e aña rondó di 5 òktober dia internashonal di maestro, e festival ‘Un kantika pa e alumno’. Durante e festival aki, e maestronan tabata dediká un kantika na e alumnonan.

Kondekorá: 2016

Área: Sosial-edukativo / Scouting / Krus Korá

 

Biografia

Señor Hugo Clarence Bonifacio Rafaela a nase dia 5 di yüni 1949 na Kòrsou. Señor Rafaela a traha 45 aña boluntariamente komo lider di hubentut, i 37 aña komo miembro di Krus Kòrá. Komo miembro di Krus Kòrá Kòrsou e tabata 10 aña koordinadó di hóben na Krus Kòrá Kòrsou.

 

For di señor Rafaela su hubentut e tabata miembro di diferente grupo di patfenderei i a okupá funshon di lider i lider máksimo den e gruponan akí.

 

Tambe, señor Rafaela a traha 5 aña ku drogadiktonan den e organisashonnan manera Nos tei pa Otro, Fundashon Speransa i tambe dos (2) aña na fundashon Skuchami.

 

Señor Rafaela a hasi deportenan di atletismo, ganando diferente medaya, i tambe a praktiká beisbòl.

 

Komo koordinadó di desaster señor Rafaela a yuda riba diferente isla di loke tabata Antia Hulandes. Señor Rafaela tin e pashon i abilidat pa yuda miembronan di nos komunidat pa yudanan mes na momentunan difísil den kalamidat.

Kondekorá: 2010

Área: Deporte (sòftbòl i beisbòl)

 

Biografia

Señor Gustavo Enrico Martin de Jongh a nase dia 25 ougùstùs 1955 na Kòrsou. Di famia, señor Taffy, manera e ta konosí den su famia i na Kòrsou, ta un deportista. Su spesialidat ta sòftbòl i beisbòl.

 

Señor de Jongh (Taffy) tin mas ku 40 aña ta trein hóbennan diariamente den deporte di pelotanan akí. E ta un entrenadó eksperensiá ku ta trein diferente divishon di sòftbòl. Tur mainta señor Taffy ta riba tereno sea ku tin kampionato òf weganan diario. Tambe el a kontribuí ‘en grande’ pa diferente hóben por a hasi deporte internashonalmente (“via scholarship”) i gana premio den sòftbòl i beisbòl.

 

Pa medio di deporte señor Taffy ta duna un kontribushon na desaroyo di deportistanan hóben. E ta konvensí ku deporte ta kontribuí hopi na desaroyo di hende. P’esei semper e ta yuda tur hóben ku ke hasi deporte, ounke e hóben no ta forma parti di su tim. Señor Taffy ta mustra tur hóben ku ke progresá den deporte, ku nan mester traha hopi duru i ku esaki ta konta pa tur loke e hóben ke logra den su bida.

 

Señor Taffy su trabounan a resultá den entre otro numeroso biaha kampion di softbol ku e tim femenino Pichingolo.